Erste Hilfe
D'Hebamme Kunz isch emol im Winter mit em Doktor Kuhn mit de Kutsche vom Jonethal her cho. Wos Brügle ab cho sind, hät de Dr. Kuhn nüme chöne bremse und isch im Neuhof une is Bruggegländer ie gschosse. D'Hebamme Kunz isch im höche Booge i d'Jona abe gheit. Dank em viele Schnee hät's ihre fascht nüt gmacht. Sie isch mit Prellige und Schürfige devo cho. No meh weh weder die Verletzige aber hät ihre weh to, dass sie em Dr. Kuhn, wo jo gschuld gsi isch, no hät müesse e Rechnig zahle zur Behandlig vo ihre Verletzige.
